Hellt ??r sk??lum

2003-12-02T19:42:00.000Z

Strákurinn er að verða frægur !

Rétt í þessu var ég að tala í síman við mann frá kvikmyndargerðarfyrirtæki staðsettu í Reykjarvík. Hafði hann mikinn áhuga á, og sótti fast, að fá mig til að leika aukahlutverk í sakamálaþáttum sem sýndir verða í sjónvarpi á næsta ári.

Ekki gerði hann reyndar ráð fyrir að ég fængi að mæla mikið af vörum fram, ef þá nokkuð. Sennilegar yrði að ég yrði einn af aukaleikurum í atriði sem tekið er upp í réttarsal, t.d. lögfræðingur. Ég sótti að sjálfsögðu fast eftir að fá að mæla nokkur orð ... og sagðist hann athuga hvort að slík hlutverk væru í boði - hélt hann þó jafnvel að slíkt gæti verið.

En hvernig stendur á því að haft var samband við mig ? Jú, fyrir uþb 7 árum síðan var í morgunblaðinu auglýst eftir leikurum í auglýsingar. Lagði ég inn auglýsingu, meira í gríni en alvöru, og heyrði svo ekkert meira.

En nú, fyrir uþb 10 mínútum síðan, hringir síminn - og mér er boðið hlutverk.

Jón er að verða STÓRSTJARNA !!!! ... eða aukaleikari sem etv. sést ekki ...

Þið munið amk að vera límd við skjáin þegar umræddir þættir verða sýndir ... en meira um það síðar - og hver veit nema að maður geti komið með einhver skúbb um stjörnurnar.

2003-10-31T22:59:00.000Z

Ég viðurkenni hér með að ég hef gaman að slúðri !

Hjá okkur Rásu voru í kvöld fullt af fólki að borða lambakjöt og horfa á Idol í sjónvarpinu ... svo sem ekki merkilegt þannig séð því þetta fólk étur nú alla jafnan eitthvað og vissulega horfum við Ráðhildur á sjónvarp - engin tímamót á ferðinni.

Það sem mér fannst hinsvegar hápunktur kvöldsins var það hversu margar útgáfur við fengum af sambandsslitum Birgittu og Hanna:
1. Birgitta og Hanni uxu hvort frá öðru - frekar leim ... frekar lítið djúsí
2. Birgitta hefði haldið framhjá Hanna með Erpi (Naz) - chilla með Birgittu í annarri og Haukdal í hinni (... ekki þó Eggert Haukdal ... slíkt væri náttúrlega viðbjóður).
3. Birgitta og Þorvaldur séu byrjuð saman - ósennilegt þar sem þau fóru nú öll út saman eftir sambandsslitin ... og þó það gæti hafa gerst eftir að þau hættu saman og væri þá ekki ástæða í sjálfu sér.
4. Hanni hélt framhjá Birgittu með Jónsa í svörtum fötum - ok ég viðurkenni það .. ég bjó þessa kenningu til - mér fannst vanta eitthvað almennilega júsí.
Þessi er svo í uppáhaldi hjá mér:
5. Birgitta og Hanni fóru saman í meðferð við kókaín fíkn en Hanni komst ekki í gegnum hana - og því lét Birgitta hann róa. Já upptökuferðin var bara coverup ... Ég hélt að Birgitta væri á samning við Pepsí en ekki Kók - ok, frekar slappur þessi ;)

Nú samkvæmt áreiðanlegum heimildum (maður uppi í grafarvogi sem sagði frá framhjáhaldi Loga Bergmanns þremur mánuðum fyrir séð og heyrt) hefur Jónsi víst verið að búa til rjómakakó undanfarna daga ... það fylgi reyndar ekki sögunni hver sæi um kakóið ... en hann kemur víst með rjómann !

2003-10-30T12:32:00.000Z

Já mikið skelfing líður mér vel í dag - já það er svo gott að uppgötva að maður sé eðiliegur (eða eðlilegri en margir aðrir amk).

Ég var að lesa fréttablaðið í gær og sá þá meðal annars fréttir af verkum lögreglunnar í Reykjavík. Þar var t.d. sagt af pari sem gat ekki ákveðið hvað ætti að vera í matinn - urðu deilurnar svo miklar að konan þurfti að kalla til lögreglu. Hvernig ætli lögreglan hafi leyst það mál ...

Ég fann hinsvegar til með grey manninum sem rataði ekki á rétt hótel sökum drykkju. Aldrei hefur maður nú verið svo drukkinn að maður hafi ekki ratað heim til sín (útlönd teljast ekki með ... sérstaklega ekki Holland), maður hefur í mesta falli lent í vandræðum með lyklana sem vilja stundum ekki alveg passa í skráargatið þegar maður hefur sopið öl - en verra hefur það nú aldrei verið.

Ég sé samt alveg fyrir mér hvernig ég væri ef ég myndi rata á rangt hótel - ég myndi sennilega ekki viðurkenna það að ég væri á röngum stað - yrði ýkt paranoid og sennilega þyrfti að kalla til lögreglu til að hjálpa manni - og þó er ég eðlilegur.

Talandi (eða skrifandi) um eðlilegt fólk - var að horfa á Leoncie (ekki lengur Indverska prinsessan) í morgunsjónvarpinu - hún söng náttúrulega lagið frábæra Ást á pöbbnum ... Víhíhíhíhið komum frá kópavogi ... ég náði því mður ekki alveg að njóta flutningsins í botn því ég hafði svo miklar áhyggjur af því að hún væri nú kannski ekki í nærbuxum og loðnan myndi skjótast út á skjáinn (hún var náttúrulega í stuttu dressi). Það kom samt ekki í veg fyrir það að lagið er gjörsamlega fast í hausnum á mér - svo ég settist niður með gítarinn og komst að því að lagið er heilir tveir hljómar (C og G) + hækkun.

Já gaman að sjá að tónlistarmenntunin frá Indlandi og Bretlandi er að skila sér í metnaðarfullum lagasmíðum. En hvað get ég svo sem kvartað - ég er kominn með lagið á heilann ... og ef það er ekki ágætis vottur um gæði lagsins (grípanleika) þá veit ég ekki hvað ! (var það ekki þetta sem bó kallaði skúringahanskatestið eða álíka ... ef skúringakonan í stúdíóinu var farin að raula lagið þá varð það hittari)

Annars skemmti ég mér við það að pikka upp lagið "Áfram Ísland" eftir baggalút ... og komst svo að því eftir á að textinn ásamt hljómum er á heimasíðu baggalúts ... jæja ágætis æfing engu að síður - og gaman að sjá að maður hefur hitt á rétta hljóma.

Púff - víhíhíhíhið komum frá kópavogi ... arg !!!

P.s. þegar karlmenn eru farnir að sofa í rúmmi dætra sinna af því að það er mýkra, auk þess sem þeir kaupa handa þeim kynlífsleikföng til þess að fræða þær um náttúruna - Þá er kominn tími til að hringja á lögregluna !

2003-10-19T16:43:00.000Z

Jæja, þá hefur maður loksins lent í því sem maður hefur lengi óttast að lenda í.

Ég synti næstum því á kúk í sundi í gær !!!

Já við hjónin ákváðum að skella okkur í ungbarnasund með nýjasta afkvæmið (Kristinn Vikar). Þegar við höfðum drekkt drengnum um stund í ýmiskonar æfingum tókum við eftir því að starfsmaður sundlaugarinnar var mættur á svæðið með risa stóran háf og var að háfa lítil spörð upp úr lauginni. Eitthvert barnanna hafði greinilega orðið mál og látið gossa í laugina. Reyndar finnst mér alveg með ólíkindum að þetta skuli ekki vera algengara ... en kennarinn vildi meina að þetta væri í fyrsta skipti í 14 ár sem barn gerði þetta. Það hefur víst eitthvað með hita laugarinnar að gera, ef börnunum verður ekki kalt kemur víst ekkert slíkt fyrir. Þarna hafði greinilega einu barninu orðið aðeins of kalt.

Reyndar hafði ég nú tekið eftir því töluvert fyrr að í einu horni gólfsins við laugina var stórt sparð ... sem ég gerði bara ráð fyrir að hefði dottið úr einni bleyjanna ... en hugsanlega var það ekki raunin.

Nú jæja ... sundlaugar starfsmaðurinn háfar nokkra tugi lítilla lorta upp úr lauginni og ekkert nema gott um það að segja.

Þegar vel flestir voru farnir upp úr, er ég í lauginni að bíða eftir því að Ráðhildur komi og sæki gæjann, fullklædd. Verður mér þá litið til botns og sé haug af lortum á sveimi. Ég hóa í starfsmanninn og bendi honum á þetta.

Hann varð ekki ánægðari en það að hann hreytti í þá sem voru í lauginni með börnin koma sér upp úr (okkur hafði verið sagt að bíða þar) - því það þyrfti að þrífa laugina. Já starfsmaðurinn var ekki sérstaklega sáttur.

Uþb 5 mínútum síðar var laugin hrein, búið að setja svokallaðan ryksugu kafbát í laugina - og hafði hann lokið starfi sínu ... enda laugin eiginlega ekkert annað en risa stór heitur pottur ... nokkrir tugir fermetra í það mesta !

A.m.k. hef ég þá lent í þeirri lífsreynslu að vera ofan í laug með kúk svamlandi í kringum mig ... og af þeim sökum hef ég ákveðið að vinna hér eftir á þeim tímum sem ungbarnasundið er ... og láta aðra um að fara með Ráðhildi og Kristni Vikari (reyndar var það ekki eitthvða sem ég ákvað).

Góðar stundir

2003-10-09T11:48:00.000Z

Ég settist niður með nýja hohner kassagítarinn minn í gær og var eitthvað að glamra, eins og Ráhildur getur sennilega vitnað um að ég geri allt of mikið af ... þó svo að mér finnist ég aldrei spila nóg.

Eftir að hafa glamrað um stund mundi ég eftir lagi sem ég samdi fyrir nokkrum árum síðan með henni Tótu vinkonu okkar Ráhildar. Upp úr þurru höfðum við skellt okkur í bíltúr á laugardagskvöldi niður í bæ í Reykjavík, og ég hafði í gríni tekið kassagítar með ... ásamt slatta af áfengi. Ferðin endaði að sjálfsögðu með tómu fylleríi af okkar hálfu (Rása var að keyra) - en í ferðinni fæddust a.m.k. tvö stór skemmtileg lög - en aðeins eitt þeirra hefur lifað af - Jesús lagið.

Ég birti hér með texta lagsins með hljómum:


Forspil:

C - F - C



C     G        C

Jesús ég elska þig

F     C        G

Jesús ég elska þig

C     F       C    G

Komdu til mín ekki fara

C     F        C

Jesús ég elska þig





C     G         C

Jesús elskar þú mig

F     C         G

Jesús elskar þú mig

C     F       C    G

Komdu til mín ekki fara

C     F         C

Jesús elskar þú mig





C     G           C

Jesús hvar hangir þú 

F     C           G

Jesús hvar hangir þú 

C     F       C    G

Komdu til mín ekki fara

C     F           C

Jesús hvar hangir þú 





C     F           C

Jesús hvar hangir þú 

C     F           C

Jesús hvar hangir þú 

C     F           C

Jesús hvar hangir þú 

C     F           Amaj7

Jesús hvar hangir þú

Takið sérstaklega eftir Amaj7 í restina ... svokölluð "Jazz ending" ... var dáldið að pæla í að koma "james bond endingu" inn í staðinn ... en það hljómar bara ekki eins vel.

Svo má náttúrulega bæta því við að í stað Jesús hvar hangir þú var stundum sungið Jesús hvar er palli ... því palli var á þeim tímapunkti í ferðinni týndur !

Gangi ykkur nú vel að spila krakkar !

2003-10-08T16:06:00.000Z

Það er nú ekki á hverjum degi sem maður sest niður fyrir framan sjónvarpið og horfir á útsendingu af Alþingi.

Það gerðist þó í gær (eða var það í fyrradag?) að mig bráðvantaði að leggja mig hið snarasta og því smellti ég Alþingi á og taldi ljóst að með slíkt á skjánum yrði svefninn ekki lengi að sækja á mann. Bjóst eiginlega við því að mr. Lokbrá myndi strá svefn dufti sínu með ræðum vinstri grænna inn í gegnum eyrun.

Því miður var ég svo óheppinn að rætt var um málefni sem ég hafði pínulítinn áhuga á að hlusta á - og þá sér í lagi vegna þess að ég sá að á ræðulista voru eintómir vinstri grænir og miðju rauðir ... + eitt stykki kóngablár Pétur Blöndal.

Pétur er einn mesti snillingur sem ísland hefur alið - og einn af fáum þingmönnum sem ég ber bæði virðingu fyrir og er sammála !

Jæja, nóg um það. Rættvar um leikskóla mál og voru vinstri grænir, með Steingrím snauðkoll í fararbroddi, búnir að leggja fram tillögu um afnám leikskólagjalda. Gott fyrir okkur barnafólkið sem greiðir í kringum 30þús per barn ! ... ekki eins gott fyrir alla hina sem þurfa í staðinn að borga þessa peninga fyrir okkur - en jæja við borgum bara fyrir alla hina þá sem á eftir koma (við erum jú að borga lífeyrinn fyrir þetta fólk).

Pétur kom náttúrulega með mun sniðugri hugmynd. Sveitarfélögin niðurgreiða hvert leikskóla plass niður í kringum 50þúsund á mánuði og um 90% barna eru á leikskólum. Þannig má segja að sveitarfélögin greiði nærri 50þús per barn.

Í stað þess að niðurgreiða meira stakk Pétur upp á að foreldrar fengju bara 50 þúsund króna ávísun per barn á mánuði - skattfrjálst (sem niðurgreiðslan er auðvitað). Þannig gætu foreldrar ákveðið hvort börnin færu á leikskóla eða hvort að annað foreldrið væri bara heima með barninu (nú eða bæði í 50% vinnu).

Nú eða að foreldrarnir myndu bara borga þeim sem þeim dettur í hug fyrir að passa börnin sín. Ömmur og afar gætu fengið borgað fyrir að hafa barnabörnin ...

Já þetta er hugmynd sem ég styð ! Kostar ekkert meira og er til þess fallin að auka jafnrétti og minnka atvinnuleysið. Nú og svo gerir hún okkur svo helvíti frjáls.

Góðar stundir

2003-10-01T21:40:00.000Z

Jæja, þá er strákurinn kominn aftur - endurnærður eftir smávegis frí frá bloggi.

Mikið er nú gaman að vera farinn að vinna aftur. Reyndar byrjaði ég fyrir töluverðu síðan, en það er alveg jafn gaman fyrir því.

Ég hef tekið eftir því að margir öfunda mig af því að fá svona langt sumarfrí - en þeir hinir sömu gera sér þá sennilega ekki grein fyrir því að þriggja mánaða (og stundum aðeins lengra) sumarfríið mitt er launalaust ... maður þráir því (peningalega) að komast aftur til vinnu til þess að geta farið að borga niður skuldirnar sem hafa safnast saman um sumarið.

Reyndar get ég ekkert kvartað sérstaklega yfir þessu sumri, verandi í barneignarfríi og svona - á 80% launum frá ríkinu fyrir að eiga barn ... reyndar eru þetta allt peningar sem ég hef sjálfur greitt, svokallað tryggingagjald - svo ég tek þetta með glöðu hjarta og get ekki sagt að mér finnist ég vera á styrkjum - í raun lít ég á dæmið þannig að í hverjum mánuði leggi ég uþb 5-6% launa minna í þennan "trygginga" sjóð.

En nóg um þessa réttlætingu mína á fæðingarorlofsgreiðslum !

Sverrir bloggaði um daginn um fyrirætlun skjás eins að talsetja sjónvarpsefni - og auðvitað held ég að vel flestir séu á sama máli að slíkt er ekkert annað en nauðgun.

Ef menn vilja fara að talsetja sjónvarpsefni ... afhverju þá ekki að fara með hugmyndina lengra.

Erlend tónlist flæðir yfir landið í tón(n)avís - hvernig væri að íslenskir söngvarar sæu bara um að syngja yfir lögin á íslensku. Gaman gæti verið að heyra lög t.d. með erlendum fokkjú röppurum þýdd á íslensku Ice-T textinn frægi hefði getað orðið svona:

"Ríddu löggunni, ríddu bandarísku alríkislögreglunni,
ríddu eitulyfjadeild ríkislögreglustjóra, ríddu bandarísku leyniþjónustunni,
ríddu Tipper Gore, Bush
og fötluðu tíkinni hans
Þetta er ÍS-Te - ég er farinn héðan
ég sagði ykkur, þið hefðuð átt að myrða mig á síðasta ári !"

Kannski væri meira að segja hægt að staðfæra og nota íslenska stjórnmálamenn og forsetann í stað þeirra erlendu ...

Nú svo þyrfti náttúrulega hver söngvari að syngja alltaf fyrir þá sömu aftur og aftur, Hallbjörn tæki allt kántrí o.s.frv.

Fyrir "mis"-músík (ömurleg heit úr vesturvegi) væri svo hægt að dubba t.d. hljóðið úr maður er nefndur - Hannes Hólmsteinn ræðir við Sigmund G. Eggertsson bónda og fyrrum búnaðarráðunaut ...

Æ.. held að þessi hugmynd sé hálf glötuð ... þó svo að þetta gæti verið virkilega fyndið - ég man nú eftir því þegar við Hilli og Jói dubbuðum yfir lýsingar á handboltalandsleikjum - við gátum hlegið af því !

Nenni ekki að blogga meir í bili ...

2003-07-17T00:09:00.000Z

Upp er runninn sá tími ársins sem mér finnst eiginlega einn sá allra skemmtilegasti - Gúrkutíminn.

Já, það gerist yfirleitt á hverju ári að ekkert er í fréttum og þá fyllast fjölmiðlar af fréttum um risavaxnar gúrkur í hveragerði og fleira í þeim dúr.

Eitt fyrsta merki þess að tími gúrkunnar sé upprunninn er þegar fréttin um fljótandi plastendurnar kemst í sjónvarpið. Ég veit ekki hversu mörg ár hún hefur birst þessi blessaða frétt um plastendurnar sem týndust á kyrrahafinu (eða einhverstaðar í langt í burtu frá íslandi) en er víst að reka til landsins. Stundum fylgir sögunni að þær hafi sést á svamli nálægt landinu. Alltaf eru íbúar íslands beðnir að hafa augun á stilkum, því ef svona kvikindi ræki nú á land, þá væri heilum fréttatíma sennilega bjargað.

Plastönd fannst í húsavík !!!
Ólafur (27) fann plastönd á reki !!!
Falleg frétt með mynd af Ólafi sitjandi á steini í fjörunni á húsavík, með fallegt hús í bakgrunni og svona sprengi blöðru með textanum {sjáið sæta húsið hans !!!}
Við hlið Ólafs er svo önnur blaðra með textanum {ekki á föstu !!!}
... og etv. ein grínblaðra {Andsetinn !!!}

Annað sem bendir til þess að nú sé komin gúrka eru erlendu fréttirnar. Þegar fréttir sem maður las fyrir einhverjum vikum síðan á erlendum fréttavefjum (og nota bene, ekki spennandi fréttir) taka að birtast á íslandi undir flenni fyrirsögnum. Maður að vakna úr dái, morðingi handsamaður (sem hafði gengið laus í 15 ár) o.s.frv., belja gleypir brjóstahaldara - frétt sem var í öllum fjölmiðlum á íslandi !

Persónulega finnst mér trixið sem fréttablaðið notar best; þegar þá vantar uppfyllingu þá skrifa þeir bara sömu fréttina nokkrum sinnum. Maður fær stundum svona dejavu tilfinningu þegar maður les fréttablaðið ... bíddu var ég ekki búinn að lesa þessa frétt áður ... og svo flettir maður fram og til baka og e.t.v. er fréttin framar í sama blaði - eða e.t.v. í blaði dagsins áður. Ég hélt ég væri orðinn geðveikur um daginn þegar ég sá magnaða frétt um stolinn stól í kringlunni - birtast tvo daga í röð ...

DV er nú svo alltaf sér á parti - það blað kaupi ég nánast aldrei ... en les hinsvegar hvenær sem ég kemst í það frítt.

Ansi skemmtileg pæling í blaðinu í dag. Þar var verið að segja frá gæjanum sem drap stelpuna í danmörku. 22 ára gæji með annarlegar hvatir. Svo var vitnað í viðtal við 19 ára fyrrverandi kærust hans til tveggja ára og hún sagðist vera í losti. Síðan kom rúsínan í pylsuendanum; þau höfðu víst ekki verið það náin að hann hefði sagt henni frá hvötum sínum.

Jæja stína, þá erum við búin að vera saman í tvö ár og mér fannst kominn tími til að segja þér frá því að í hvert skipti sem við gerum það er ég að hugsa um 10 ára stelpur !
... ég leyfi mér að efast um það að sama hversu nánir svona einstaklingar verða maka sínum - þá fara þeir tæplega að segja frá þessum fantasíum ... menn kannski segja frá einhverjum leyndum draumum um trekant og aftaníþræðslur ... en kynlíf með börnum held ég varla að nokkur maður fari að minnast á við konuna sína !

Hjá okkur fjölskyldunni má segja að nokkurskonar gúrkutíð sé í gangi. Af okkur er bara ekkert að frétta, ekkert markvert hefur svo sem á daga okkar drifið. Veiddi ekki neitt í veiðinni um daginn, klappaði reyndar einum fiski sem var fastur í sefi - og losaði hann í leiðinni (ok, ég var að reyna að moka honum í land) - sá svo nokkra laxa, en þeir vildu ekkert taka.

Deginum í dag eyddum við í tóma vitleysu - sleiktum sólina og höfðum það gott ... grey laufey orðin hálfgerð brunarúst í framan eftir rólóveru dagsins.

Enn er Laufey með Davíð Oddsson á heilanum - sem er svo sem allt í góðu (sýnir bara að hún er vel upp alin). Um daginn var hún að tala um Svamp Sveinsson (Spongebob Squarepants) og ég sagði henni að Afi hennar héti Jón Sveinsson, næstum því eins og svampur sveinsson. Henni fannst þetta þrælmagnað, hljóp til mömmu sinnar og sagði; Afi heitir Davíð Oddsson !

Ætli ég fari ekki bara að rækta gúrkur eða eitthvað - svo maður hafi nú eitthvað að blogga um ...

2003-07-09T12:28:00.000Z

Jæja, þá er það veiðin einu sinni enn (eins og mér finnist það nú einhverntíman of oft) - ætli maður veiði nokkuð frekar en venjulega ?

Álfta á mýrum heitir áin, vatns- og fisklaus sennilega, jæja maður getur þá amk skemmt sér við að skola ánamaðka í vatninu ...

Ragnar bróðir hennar Ráðhildar var í flugvélinni sem "kveiknaði í" á leiðinni frá Portúgal. Grey strákurinn gleymdi GameBoy tölvunni og nýja leiknum sínum í vélinni - því svo mikil voru lætin þegar farþegar voru látnir yfirgefa vélina í skyndingu. Hlýtur að vera skemmtileg lífsreynsla að vera í millilandaflugi og allt einu eru bara reikur í farþegarýminu.

Maður hefur nú aldeilis upplifað næstum því flugslys, fékk svona "near death experience" - eða þannig.

Vorum á leiðinni í flugvél frá heimaey, eftir velheppnað þing ungra sjálfstæðismanna. Verð reyndar að viðurkenna að ég man sem minnst eftir þinginu, en þeim mun meira eftir "sticky puffin" sem var magnaður staður. Bandið sem spilaði lummulögin (sem maður dansaði og söng með), 16-17 ára stelpuna sem fór heim með pabba vinkonu sinnar og svona ...

... jæja aftur að flugferðinni !

Eftir að hafa verið loftinu í nokkrar mínútur bendir einhver út um gluggan í átt að hreyflinum sem og spyr hvort að þetta sé eðlilegt. Sjáum við þá að hann er við það að hætta að snúast. Við höfðum svo sem ekki miklar áhyggjur (eða jú, reyndar fólkið fremst sem kysstist síðasta kossinum alla leiðina hefur sennilega verið áhyggjufullt), fannst þetta eiginlega frekar fyndið - sérstaklega eftir að ég hafði fullvissað mig um að hinn hreyfillinn væri örugglega í gangi. Sungum aðeins "Labamba" og gerðum að gamni okkar. Flugstjórinn sagði síðan að eitthvað á þessa leið "einkennilegur lestur á einum mælanna, ákvað að slökkva á öðrum hreyflinum, verðum aðeins lengur á leiðinni".

Það var ekki fyrr en við komum inn til lendingar í Reykjavík að við áttuðum okkur á því að það var eitthvað að gerast; hringbraut lokuð, löggubílar út um allt, slökkvibílar og sjúkrabílar á flugbrautinni og ég veit ekki hvað og hvað. Það sem mér fannst sárast var að við fengum ekki auka umgang að súkkulaði - og við í lífsháska.

Annarsvegar var okkur ekki boðin áfallahjálp - þrátt fyrir að ég hefði beðið um hana þegar við komum úr flugvélinni. Í sjónvarpsfréttunum mátti heyra mig hrópa orðin "ég heimta áfallahjálp" !

... og þar með voru mínar 15 mínútur (eiginlega sekúntur frekar) af frægð liðnar.

Annars líður mér vel að hafa næstum lent í flugóhappi. Líkurnar á því að lenda í slíku eru afar litlar - þannig að líkurnar á því að lenda í slíku tvisvar eru enn minni !!!

2003-07-05T17:12:00.000Z

Djöfull þoli ég ekki stuðningsmenn !

Nú hef ég stundað það í sumar, eins og önnur sumur, að fara og glápa á FH spila í fótboltanum. Ég tel mig vera stuðningsmann FH - svona óskup rólegan stuðningsmann. Svona stuðningsmann sem fer ekki í taugarnar á sjálfum mér (eins og flestir stuðningsmenn gera).

Þegar mínir menn standa sig vel, þá hef ég klappað og jafnvel hef ég átt það til að kalla áfram FH (sérstaklega á heimavöllum annarra liða). Ef dómarinn gerir svaka skandal tuða ég yfirleitt ofan í barminn á sjálfum mér eða segi eitthvað á þessa leið "djöfulsins bull" við félaga mína. Meira geri ég nú ekki.

Það veldur mér alltaf jafn miklum heilabrotum hvað fólk getur verið ruglað. Aldrei skal maður fara á fótboltaleik öðru vísi en í næsta nágrenni við mann sitji manneskja sem hefur ekki hundsvit á neinu sem viðkemur knattspyrnu (og skiptir þá ekki máli hvaða lið eru að spila - og þó meira um það síðar). Það virðist hinsvegar haldast í hendur að þeim mun minna sem fólk veit, þeim mun meira kallar það á dómarann. Heimtar rauð spjöld fyrir löglegar tæklingar og víti þegar við liggur að boltinn sé í röngum vítateig !

Það fer samt einna mest í taugarnar á mér þessir ofur-stuðningsmenn. Hvetjandi liðið sitt allan tímann, voða ferskir, áfram, já koma strákar. Og syngja svo hallærisleg lög ef liðið skorar. ARG Sæi í anda að ég færi að syngja "skoriði mörk, skalla bolt'i netið, skoriði mörk ekki fara fetið, skoriði mörk og sýnið hvað þið getið í krikanum" (veit ekki hvort að þetta er réttur texti, því ég syng ekki svona lög). Ok, ég skal viðurkenna að ég hef haft það fyrir venju að fara á sigurhátíðir KR-inga til að syngja FH slagara - en aldrei á leikjunum sjálfum - ALDREI !

Mér finnst einnig óstjórnlega fyndið þegar fólk uppi í stúku heldur að það geti haft voðaleg áhrif á það hvað leikmennirnir geri. Gefðann á Helga, ekki svona, tala saman strákar, inn á miðjuna, krossann á kantana. Um daginn sagði meira að segja einn framarinn "hvað er ég búinn að segja þetta oft" þegar leikmenn voru ekki að hlíða.

Já, stuðningsmenn Framara fara sérstaklega í taugarnar á mér, þar fer fólk sem virðist ekki hafa mikið vit á knattspyrnu. Etv. er þetta lið sem fjárfesti á sínum tíma í hlutafélaginu og lítur þar af leiðandi á leiki sem hluthafafundi ? það gæti skýrt ýmislegt. Ég verð samt að viðurkenna að mér fannst móðir hans Þorbjörns Atla alltaf jafn skemmtileg "áfram frammarar, áfram frammarar" svona kallaði hún í 90 mínútur alveg stanslaust, nema þegar hún tók sér pásur til að kalla á dómarann. Ég ímyndaði mér á tímabili að það væri sveif í rassgatinu á henni sem einhver snéri og spilaði á hana svipað og lírukassa (og á meðan dansaði Þorbjörn Atli inni á vellinum líkt og lítill api).

Stuðningsmenn ÍA held ég samt að séu þeir allra vitlausustu, enda samanstendur sá hópur af mæðrum leikmanna og öðru kvennfólki sem sennilega er skylt leikmönnum og horfir þess vegna á boltan, en ekki vegna þess að þær hafi af því gaman eða mikið vit á því sem er að gerast (amk virðast þær ekki skylja einfalda hluti eins og rangstöðu og innköst).

KR ingar eru náttúrulega bara eins og þeir eru - lítið hægt að ræða um það.

Þróttarar saman standa síðan af einhverju svona vonnabí-þotuliði sem virðist fá ótrúlegt kikk út úr því að mæta á leiki til þess að vera ofur-hressir, syngja og tralla ... ojj barasta.

Við stuðningsmenn FH erum hinsvegar lið sem aðrir stuðningsmenn ættu að taka sér til fyrirmyndar. Sitjum hljóðir allan leikinn, klöppum að hefðarmannasið þegar liðið skorar og klórum okkur í skegglausri hökunni þess á milli. Minnir dáldið á breska hefðarmenn frá 19. öld að horfa á Póló. Og við höfum sko vit á knattspyrnu.

Bara að allir gætu verið svona fullkomnir eins og við !!!

2003-07-04T00:08:00.000Z

Ekkert títt - mikið skelfing lifi ég merkilegu lífi ... skrifaði síðast nokkrar línur á mánudaginn - og ekkert hefur gerst síðan !!!

o jæja ... jújú, ýmislegt hefur gerst - en bara ekkert sem hefur pirrað mig það mikið að ég hafi þurft að tuða yfir því hér á vefnum.

Fórum upp í Borgarfjörð á þriðjudaginn að hitta foreldra hennar Ráðhildar sem voru búin að koma fellihýsinu sýnu fyrir á sumarbústaðalóðinni sinni. Steig reyndar ekki fæti inn á þá lóð heldur dvöldum við í bústað sem stendur á lóðinni við hliðina ... sem einmitt er í eigu Gunna (kjjjjjellingar) bróður hennar Hönnu Siggu (sem einmitt er mamma Ráðhildar).

Ljómandi gaman allt saman, fínasta verður, afrekaði meira að segja að sofna í sólbaði (og vaknaði ekki fyrr en sólin var farin og ég sat á stuttermabol í 10 stiga hita - frekar kalt).

Á leiðinni heim stoppuðum við í sjoppi í Borgarnesi, vann 2000 kall í spilakassa sem borgaði ferðina í gegnum göngin báðar leiðir - það má næstum því segja að við höfum fengið borgað fyrir að fara uppeftir ... NÆSTUM því ...

Hef tekið eftir því að þeir sem virðast spila mest eru eldri borgarar, öryrkjar og gular konur. Skemmtileg hringrás; Ég borga skatta, skattarnir fara í það að borga fólkinu bætur, bæturna fara í spilakassa, og úr spilakassanum renna peningarnir til mín. Hefði ekki bara verið einfaldara að sleppa því að borga fjandans skattinn strax. Ætli þeir á skattstofunni tækju þessi rök marktæk ?

Laufey var að fá í eyrun í þriðja skiptið á tæpum mánuði - var að koma með hana frá lækni. Mikið var hún nú ánægð að fá ógeðslega meðalið einu sinni enn ... en hún er nú voðalega dugleg greyið að taka þennan viðbjóð inn - fær bara pening í baukinn í staðinn. Spurning hvort að maður getur beytt svipuðu trixi á mömmuna, borga henni fyrir að gleypa hina og þessa miður gómsætu vökva ... nei úbbs ... nú er ég að hugsa upphátt.

Set inn smá nördatal svo fólk sem ekki vinnur við tölvur átti sig aðeins á því hvernig dæmigert vandamál getur lítið út.

Begin Nördatal

Lenti í stórskemmtilegum málum með Kalla (tæknimanni) í gærdag. Vorum að breyta póstþjóna málum NTV. Fram að þessu hafa póstþjónamálin verið dáldið skondin.

Svona hafa hlutirnir verið:
Eitt stykki Sendmail daemon sem keyrir á RedHat 6.1 (já, Cartman ... RH 6.1 !) tekur á móti öllum pósti og áframsendir hann á Notes þjóninn í kópavogi. Notes þjónninn í kópavogi áframsendir síðan hluta póstsins áfram á notes þjóninn í hafnarfirði. Allur póstur út hefur einnig farið svipaða krókaleið.

Það sem við vorum semsagt að gera var að taka alla þessa póstþjóna og setja bara einn Notes þjón í staðinn - enda öll starfsemi skólans að flytjast á einn stað.

Þegar ég mætti á svæðið var kalli búinn að sameina notes þjónana - dns þjónninn virtist vera í rugli og linux póstþjónninn bara var á staðnum ... en gerði í raun lítið (en samt eitthvað).

Það fyrsta sem ég tók eftir var að DNS þjónninn var hættur að skynja netkortið sitt - eftir uþb hálftíma fékkst hann til þess að fatta það aftur (sennilega hefur vantað eina línu í ifcfg-eth0)

Því næst tóku við breytingar á póstþjónamálum

Ég skellti inn nýju MX record á DNS þjóninn sem benti á c2h5oh
Tók mail.ntv.is niður
Breytti mail routing upplýsingum á notes þjóninum
Breytti nafni DNS þjónsins úr webserver (já !) í ns1
-> ekki var hægt að senda póst út úr húsi
fór yfir allar stillingar aftur
-> enn var ekki hægt að senda póst út úr húsi
Komst að því að í stað þess að skrifa c2h5oh í MX recordinu í DNS zoneunni hafði ég skrifað c2h50h ... breytti því snarlega
-> getum sent póst út - en notes þjónninn virðist ekki vera að gera sitt djobb
Fól kalla að reyna að finna út úr því - enda kann ég ekkert á lotus notes

End Nördatal

Stafþrykkir hefur lokið máli sínu.

2003-06-30T13:38:00.000Z

Mikið var þessi helgi nú skemmtileg.

Það byrjaði allt saman á fimmtudags kvöldinu þegar upp kom sýking í b álmu mjólkurbús flóamanna, en það er nafnið sem gleðipokar (e. funbags) Ráðhildar heita um þessar mundir sökum framleiðslu. Bregðast þurfti snart við sýkingunni og var því haldið upp á sængurkvennadeild um miðja aðfaranótt föstudags til þess að fá kreistingu og sýklalyf. Lyfin virðast virka vel - sem betur fer - en þeim fylkir annarsvegar megn óþefjan og hinsvegar súrmjólk í brjóstum (amk virðist sá stutti ekki vera sáttur).

Á föstudaginn tók Ráðhildur svo upp á því að næla sér í ælupest og hóf að losa sig við innihald meltingarfærana öfuga leið í tíma og ótíma. Sérstaklega skemmtilegt var þegar maginn gerði uppreisn þegar við vorum með fullt hús af gestum. Grey Hannes, Guðný, Lína og Ottó þurftu sennilega að berjast við ógleðina sjálf (það er alltaf eitthvað svo flökurleikavaldandi að heyra annað fólk æla) - en ég var í burtu að sækja skæruliðann á leikskólann.

Sem betur fer fékk Laufey að gista yfir helgina hjá ömmu Sigrúnu og afa Nonna uppi á krókó - nógu var ástandið á heimilinu eldfimt !

Laugardagskvöldi og sunnudegi eyddi ég að mestu í vatnaflengingar með flugu. Til að gera langa sögu stutta tókst mér ekki að veiða neitt sem ekki flokkaðist undir smáfiskadráp. Ég kom því heim með öngulfar í neðrivör (engar myndir fylgja til sönnunar). Mér gekk þó ekkert verr heldur en öllum hinum ... ég varð þó allaveganna var við fisk og meira að segja missti einn sem hefði getað nært 10 eþíópíubúa með léttu (eru þeir ekki afar matgrannir ... 10-15 kaloríur á mann) ! Ég verð að fara að fjárfesta í hægsökkvandi línu - þessi sökkendi sem ég hélt að væri svo sniðugur var ekkert að gera sig.

Það var þó einn ljós punktur við helgina, litli kútur byrjaði að brosa :o)

2003-06-26T15:06:00.000Z

Ja hérna, ég er víst orðinn harður andstæðingur hvolparæktar á íslandi ... !!!

Var að skoða batman áðan (eins og gerist ansi oft) og sá þá sniðugan tengil sem bar titilinn "Gegt eru margir sem heita Jón Jónsson". Þar sem ég heiti Jón og er Jónsson fannst mér þetta pínulítið áhugavert. Tengillinn bar mig inn á undirskrifalista þar sem mótmælt var reglugerð um hundarækt og eitthvað sem mér hefði aldrei dottið í hug að setja nafn mitt við ... enda ekki vanur að skrifa nafn mitt á mótmælalista. Við nánari skoðun sá ég að stór hluti þeirra sem hafði skrifað undir listann heitir nafninu Jón Jónsson, sem mér fannst að sjálfstögðu hálf einkennilegt - því þó við séum margir sem eigum ófrumlega foreldra ... þá erum við tæplega allir á móti hundarækt.

Við nánari athugun kom í ljós að nafnið mitt er á listanum (reyndar sleppt úr millinafninu) - en það gat ég séð af kennitölunni.

Nú kemur tvennt til greina:
a) Eftir mikla og stöðuga eiturlyfjaneyslu gæti ég hafa lent í black-outi og skrifað nafn mitt á undirskriftarlista gegna hvolpaeldi
b) Einhver sniðugur hefur flett upp nafninu Jón Jónsson í þjóðskrá og skrifað slatta af einstaklingum á listann

Ég hallast að því síðarnefnda, sérstaklega þar sem ólögleg lyfjaneysla hefur verið með minnsta móti ...

Ég skrifaði því bréf og bað um að nafnið mitt yrði þurkað út af listanum hið snarasta ! (enda mikið prinsipp mál fyrir mig þar á ferðinni)

Sá á magnaða frétt á mbl.is að nú megi ekki banna kynmök karla í Texas.

Maður þarf þá ekki að óttast ferðalög þangað í framtíðinni ... ef manni dytti nú í hug að skipta um kynhnegð svona upp úr þurru (maður er náttúrulega búinn að eignast sinn skerf af börnum og svona), er ekki samkynhnegð í tísku annars.

Fréttin var annars dáldið skondin:
"Mál þetta hófst þegar lögreglumenn handtóku tvo karlmenn, sem voru staðnir að því að hafa kynmök í íbúð annars þeirra í september 1998. Mennirnir voru ákærðir og dæmdir til refsingar á grundvelli laganna í Texas."

umm ... hvað var lögreglan að gera í íbúðinni fyrir það fyrsta ... grunaði hana að þar væri framinn stórglæpur í formi kynlífs tveggja karlmanna. Og hvers vegna í óskupunum datt einhverjum í hug að fá mennina dæmda fyrir þetta. Það er nú ýmislegt sem úrsérgengin lög banna manni að gera ... en maður gerir bara samt.

Pæliði í því ef maður yrði bara handtekinn fyrir að vinna á sunnudegi eða borða kjöt á föstunni ... veit reyndar ekki hvort að nokkurntíman hafi verið til lög sem bönnuðu þetta beinlínis - en ég er nokkuð viss um að þeir félagar á Ómega myndu vilja að þetta væri bannað - enda ekki í takti við fagn'erindið.

Annars hef ég aldrei skilið afhverju sunnudagur á að vera hvíldardagur - er ekki sunnudagur fyrsti dagur vikunnar (ef þriðjudagur er sá þriðji og fimmtudagur sá fimmti). Tók Guð sér ekki hvíld eftir vel unnið verk ... varla hefur hann hvílt sig áður en hann byrjaði að skapa ... nema að hann hafi verið eitthvað andlaus og þurft að taka sér einn dag til umhugsunar áður en hann byrjaði - en þá er biblían að ljúga ... arg ... best að hvíla sig bara alla daga í sumar til að vinna upp alla hvíldardagana sem maður hefur svikið drottinn um í gegnum tíðina.

Á sennilega eftir að blogga síðar um biblíuna - hún hefur lengi verið mikið áhugaefni hjá mér.

2003-06-25T08:35:00.000Z

Jæja, kominn úr veiðinni !

Mikið getur nú þessi veiði verið einkennileg stundum, stóð úti í vatni einn og hálfan dag og náði fjórum fiskum ... mér var eiginlega alveg hætt að lítast á blikuna - mér sýndist allt stefna í met varðandi litla veiði !

En eins og hendi væri veifað breyttust aðstæður aðeins (úr brjáluðu roki í brjálað rok og hellidembu). Fiskurinn fannst, en hann hélt sig aðeins dýpra heldur en við áttum von á. Ég skipti um stöng og á u.þ.b. hálf tíma fékk ég fimm í viðbót - alla á bilinu 1 - 3 pund. Svo var farið upp í hús að taka sig til fyrir heimferðina.

9 fiskar ... mun skárra en 4 ... og það sem meira er - sennilega met veiði hjá mér, en mikið fyrir því haft engu að síður !

Reyndar held ég að þessi veiðitúr fari í sögubækurnar sem einn allra fengsælasti veiðitúrinn okkar í langan tíma. Hlíðarvatn reyndist 50 fiskum fátækara eftir túrinn, sem þýðir þá að ég reyndist aðeins undir meðal veiðinni (10 fiskar per. stöng) ...

Nú er bara að muna að kaupa sér sökk enda á svo ég geti notað flotlínuna í næsta túr (sem er einmitt fimmtudag-föstudag), en þá er viðbúið að aðstæðurnar hafi breyst og fiskurinn haldi sig einhverstaðar þar sem maður finnur hann ekki ... svona er nú veiðin.

Annars er það helst að frétta að í veiðitúrnum gerði ég magnaða tilraun.

Fyrri daginn drakk ég öl, ekkert voðalega mikið ... eina kippu eða svo (+- slatti af einhverju öðru). Daginn eftir tók við hin dæmigerða ælu þynnka sem virðist vera orðinn partur af prógramminu í seinni tíð. Einhver stakk upp á því að þetta gæti verið einhverskonar óþol fyrir bjórnum (e.t.v. gerið). Ég tók manneskjuna náttúrulega á orðinu og drakk ekkert öl daginn eftir (heldur meira af öllu öðru, og þá sérstaklega var það Kapteinninn sem fékk að finna fyrir því). Daginn eftir var ekki að finna að nokkuð hefði verið drukkið kvöldið áður.

Það skyldi þó ekki vera að blessaða ofur-þynnkan, sem ég virðist alltaf fá í seinni tíð, væri bara óþol. Þarf að gera frekari tilraunir í framtíðinni.

Spennandi verkefni framundan !!!

2003-06-21T02:26:00.000Z

Djöfull er ég búinn að vera pirraður í dag ... 11 þúsund kall farinn út um gluggann (á bílnum).

Já, það getur verið dýrt að forða árekstri, sérstaklega þegar bærinn er búinn að fegra göturnar í kringum húsið okkar svo mikið með því að setja hornrétta kanntsteina meðfram götuhornum. Hver er eiginlega pælingin með því ? Vera alveg viss um það að maður rústi örugglega dekkinu ef maður rekst aðeins utan í.

Fyrir nokkrum dögum síðan var ég að flýta mér heim til þess að sjá íslendinga tapa fótboltaleik í sjónvarpinu (nema hvað við unnum í þetta skiptið 0-3). Kemur ekki einhver ungur strákur á fullu niður götuna á móti mér og virðir ekki biðskylduna ... til þess að forða árekstri beygi ég bílnum aðeins til hliðar ... og úbbs - upp á kannt.

Nú er þetta ekki í fyrsta skipti sem maður keyrir aðeins upp á kannt og svona ... nema hvað að þessi kanntur var sem sagt svona "glæsi" kanntur, horn réttur, sérstaklega smíðaður til þess að rústa dekkjum. Hið óumflýjanlega gerist náttúrulega dekkið spryngur - og þá meina ég með látum ... gjörsamlega ekkert nema tæjur eftir. Felgan (glæsileg úr áli og svona) öll beygluð og allt í volli.

Ég held samt að ég hafi sett íslandsmet í dekkjaskiptingu með hálfan tjakk (vantaði sveifina) !

Viðgerð á felgu: 3500 kall
Nýtt Dekk: 7500 kall
Að skipta um dekk með hálfum tjakk meðan ísland er að vinna leik í sjónvarpinu: ómetanlegt ...

11. þús kall - það gerir hvað 10 kippur af bjór ... 2 og hálfur kassi ... djöfullinn sjálfur !

Spurning hvort að maður sendir ekki samfylkingunni bara reikning fyrir þessum skaða mínum - þetta er náttúrulega henni að kenna. Hún setti þennan hornrétta kannt og ég efast ekki um að þessi "svínari" er í samfylkingunni ... amk var hann með svona jafnaðarmanna sauðasvip !

Talandi (eða skrifandi) um samfylkinguna, fékk eina magnaða upphringingu í gær frá Gallúp. Fjöldinn allur af mis gáfulegum spurningum.
Var t.d. spurður hvort að ég gæti hugsað mér að kjósa sjálfstæðisflokkinn aftur - Jújú, ég gat alveg hugsað mér það.
Næsta spurning: Kemurðu hugsanlega til með að kjósa hann næst ... hmm ... nei ég hugsa alltaf þrennar kosningar fram í tímann - næst eru vinstri grænir ...

Skemmtilegasta spurningin fannst mér samt hvort að ég gæti undir einhverjum kringumstæðum hugsað mér að kjósa samfylkinguna - eftir langt svar sagði ég Já. Svo sannarlega get ég hugsað mér að kjósa samfylkinguna ef hún breytist í rótækan hægri flokk ! ... en þar sem ég mátti víst ekki skila með athugasemd, þá varð svarið að vera nei ...

2003-06-19T14:53:00.000Z

Jæja, þá er maður búinn að vera í sumarfríi ... nei leiðréttist ... barneignarfríi í heila 6 daga - og hef enn ekki nennt að gera nokkurn skapðan hlut.

Sem betur fer álíta allir að þar sem að nýr einstaklingur hefur bæst í fjölskylduna hljóti maður að vera upptekinn og innilokaður í sumar ... þetta fer nú samt allt að lagast - veiðitúr um helgina (sennilega verður eitthvað tekið í flöskur þar).

Ég var að horfa á sjónvarpið í gærkvöldi - sem er svo sem ekkert undarlegt þar sem ég hef lítið gert annað í þessu svokallaða fríi (fyrir utan skeiningar og þess háttar), nema hvað birtast ekki á skjánum auglýsingar - sem heldur er ekkert svo undarlegt þar sem slíkt gerist undantekninga lítið.

Jæja, auglýsingarnar að þessu sinni snérust um það hvað þessir og hinir væru duglegir að bjóða okkur upp á frábæra sjónvarpsdagskrá næsta laugardagskvöld. Þessi þáttur í boði þessa, kvikmynd í boði einhvers annars og svo koll af kolli.

Ég hlýt eitthvað að vera að misskilja hlutina - ef fyrirtækin eru alltaf að bjóða mér upp á þetta og hitt ... afhverju er ég þá að borga marga þúsundkalla í hverjum mánuði ? Er ég þá ekki að borga fyrir þessar myndir og þætti ? Ef ég er að borga fyrir þessar myndir og þætti ... á ég þá ekki að fá endurgreitt víst að fyrirtæki út í bæ er að bjóða mér upp á dagskrána. (maður borgar víst ekki venjulega fyrir það sem er í boði annars)

Eina stöðin sem vissulega hefur rétt á að auglýsa svona er náttúrulega skjár einn - sem er sú stöð sem maður horfir mest á - og borgar ekki krónu fyrir, enda dagskráin þar í boði auglýsenda. OK, ég borga fyrir hana með þeim vörum sem ég kaupi ... einhverstaðar verða fyrirtækin jú að fá pening til að auglýsa.

En þá má spyrja, er ég ekki að borga tvisvar eða oftar fyrir sjánvarpsdagskrána á stöð 2 og rúv ?

Fyrst borga ég gjald í hverjum mánuði. Síðan kaupi ég vörur af fyrirtæki sem eyðir hagnaðnum í að borga sjónvarpsdagskrána fyrir mig ... og á sama tíma er örugglega eitthvað á hinni ákskriftarstöðinni sem er í boði einhver sem ég hef verslað við - án þess að ég sé að horfa !

Þetta er náttúrulega lítilsvirðing við áskrifendur að segja svona: Þessi dagskrárliður er í boði einhvers ... því ég er búinn að borga fyrir hann.

Ég get vel ímyndað mér hvað hann Bjartur í sumarhúsum hefði gert í þessari stöðu. Hann hefði slökkt á sjónvarpinu. Enginn vill ég ölmusu maður vera - ég borga fyrir mitt sjónvarpsefni sjálfur

Sjónvarpsstöðvarnar mættu hinsvegar auglýsa svona:
- þessi þáttur er í boði þín sjálfs ...
- takk kæri áskrifandi, án þín myndu börnin okkar svelta, starfsfólk stöðvar 2
- kæri áskrifandi, án þín þyrftum við að ræna landsíman - njóttu vel

... og hana nú !

2003-06-18T15:00:00.000Z

Jæja, hver hefði trúað því að Jónsi sjálfur ætti eftir að blogga ... ja, hver hefði svo sem átt að vera að velta sér upp úr því !

Geri mér ekki neinar vonir um að þetta verði lesið - enda er hugmyndin frekar að tappa aðeins af kerfinu ... svona áður en upp úr sýður